【龍虎山众】楊松泰ー夜行狂人（自稱）

阿泰是個青春陽光小子，與大部分愛好大自然的人一樣，細時已經通山走。

父親白天帶他到小溪看魚捉魚，晚上一家人一齊睇Discovery Channel野外紀錄片。

大學主修生態學，「上莊」揀了本科的生態學及生物多樣性學會 (EB Soc)，看似理所當然，但吸引他走上熱血夜行路，又點止一個degree。

泰：入大學當初目標只係想揀同環境有關嘅科目，參加EB Soc Oday*，活動就係上龍虎山夜行，第一次就見到青竹蛇！之後上咗莊，因為搞活動要pre-trip，有時就係自己興起，間中都會夜行上山。

至於我幾時中毒，就要講到有次見到隻花狹口蛙，喺我面前上演咗一場白蟻放題，佢捕住喺個巢前面，係咁食爬出嚟嘅大飛蟻，任我睇任我影，我望咗佢成個鐘都唔捨得走。經過嗰次之後我就上晒癮（笑）。有時朝早已經參加過其他活動，我都會堅持夜晚上山，因為唔想錯過任何一個驚喜！

好似我上次喺龍虎山見到金腳帶；另一次夜行又見到銀腳帶同條細白環蛇爭食一條石龍子。佢地外表好相似，影出嚟好特別！銀腳帶係一個會食其他蛇嘅品種，經過一輪搏鬥，最後細白環蛇都係知難而退！細個睇電視紀錄片都係講外國，冇諗過香港都有呢啲動物睇。

膽粗粗開咗個instagram (herpnight_hk) 分享自己夜行嘅感動時刻，估唔到竟然有人direct message話想一齊夜行，又俾多個理由我夜行多幾次（笑）。

*Oday = Orientation Day 迎新日

#除咗分享圖片影片之外 #阿泰仲會分享自己個人感受 #好詳細嘅感受 #仲有好多金句hashtag #以下係一啲節錄 #今日見到嘅聽日未必見到 #每一次夜行都係新嘅一次 #感激大自然  #熱血青春 #於大自然揮灑 #咁嘅大學生涯 #唔好葡萄喇