【龍虎山众】我的迷你後花園 - 鄭太

受訪者言論不代表本中心立場

在龍虎山的「身體健康」斜坡*碰到鄭生、鄭太時，兩位正以山水淋花。他們身材健碩、臉色紅潤，完全看不出已經70多歲。鄭太性格健談開朗，三兩分鐘就聊開來。

鄭太：以前呢度有幾間觀音廟**嫁，行山友上嚟打牌、飲茶，經佢地介紹開始飲山水。依家飲咗20幾年，飲唔返水喉水嫁喇，覺得好大陣氯氣味，所以一星期上山四日過嚟打水！

呢度啲植物要淋吓先生得好嫁，你俾啲水佢，佢俾返啲氧氣你，吸完新鮮空氣個人都精神啲，如果唔係我呢啲老嘢一坐低就瞌眼瞓（笑）。

但就有啲人會破壞囉，佢哋覺得啲植物阻住睇景，攞把剪嚟修，呢棵樹啲葉以前一個球咁多，都俾佢修到一碌竹咁（怒）。仲有啲人搣大紅花，啜啲花蜜，仲教小朋友啜，我睇唔過眼，始終呢度係郊野公園，冇需要貪個少少便宜，同佢講笑咁講：『買粒糖已經夠啜到佢生飛滋啦！』，有時真係俾啲人激死。

你上龍虎山做運動又好、行山又好、咩都好，就唔好破壞啲嘢，對大自然好啲丫嘛。

*沿一號種植場樓梯上山到分叉口，右邊斜坡有幾張與山坡連成一體、由以前晨運客DIY的石屎櫈，上面刻著簡體字「身體健康」。
**她所說的觀音廟應該是西林佛堂及觀海寺，以前晨運客興建及打理，在1998年成立郊野公園時拆卸。