掘蜆八大守則 ─ 細蜆長流

水口灣幅員遼闊、背山面海、環境清幽、生機處處。由多種海岸生境組成，包括紅樹林、潮澗沙灘同泥灘等。豐富嘅生物多樣性近年更令它成為生態旅遊熱點，每逢夏季的週末假期，不少遊人會專程跑來泥灘「掘蜆」。

過度採集所引致一連串生態後果
經媒體年前多番佈導，令唔少人慕名到水口灣進行休閒掘蜆活動。但係唔受規管嘅掘蜆活動不單導致過度採集，同時干擾當地嘅生物同棲息地，引致一連串生態後果，包括：沙泥層被翻動，導致海床地形改變、改變食物鏈嘅群種結構同埋蜆類物種數量減少等。一啲體形大到可以繁殖嘅蜆隻經常被人大量掘走，剩低喺泥灘嘅蜆類繁殖力有限，直接減少蜆類繁殖嘅機會。

掘蜆八大守則
為咗減輕掘蜆行為帶嚟嘅負面影響，本會和學者以及水口居民共同制定咗一套自願遵守嘅「掘蜆八大守則」。

八大守則包括：細蜆長流、知足常樂、輕裝上陣、填返個氹、避開紅樹、尊重生物、小心潮漲、不留痕跡。

1. 細蜆長流：唔好帶走體形太細嘅蜆隻，等到佢地繼續成長至成熟並可以繁衍，令生態生生不息。
2. 知足常樂：夠，就好收手啦，過度收採會對蜆隻族群造成災難性影響。
3. 輕裝上陣：使用破壞性較低嘅掘蜆工具，例如小泥耙，佢嘅影響範圍較細，可以減輕對泥灘嘅生態影響。
4. 填返個氹：掘完記住將水窪填平，加快泥灘嘅恢復速度。
5. 避開紅樹：紅樹林同河流棲息咗好多蜆類以外嘅生物，遠離呢啲生態敏感地可以避免騷擾同傷害佢地。
6. 尊重生物：尊重馬蹄蟹同埋其他生物，觀察時唔好踐踏、觸摸同埋傷害佢地。
7. 小心潮漲：前往泥灘前，應先查清潮水嘅漲退時間，小心安全。
8. 不留痕跡：帶走所有帶來嘅物品，留下嘅任何東西除咗會成為海洋垃圾，更有機會纏繞住野生生物。

瞭解蜆類保護尺
現時掘蜆活動唔受規管，掘蜆遊人都慣性「大小通吃」：將體形大隻可繁殖嘅蜆隻帶走，牠們的繁衍機會故然會減少；若然還未長至成熟的細小蜆隻亦同時被帶走，泥灘便沒有足夠蜆隻繼續成長以繁衍後代。因此，本會製作咗一把蜆類保育尺，等大家可以參考，邊啲蜆隻可以採邊啲蜆不應採。

保護尺嘅使用方法好簡單：首先平放蜆隻，比對測量圈嘅直徑，如果蜆隻可以穿過測量圈，咁就要擺返低唔好收採啦！

WWF正於水口灣進行有系統的生物多樣性調查，及協助未來制定適切保育措施去管理棲息地和物種。我地需要大家一齊加入生態調查隊伍，即使沒有任何環境相關學科背景都可以幫手啊！（8月3日、11日、31日要人！）

詳情及報名：網上表格

 

文蛤（沙白）係水口灣經常被人採集嘅品種，本會建議，沙白長方最少要達到 40毫米（即4厘米）先好採集。

而呢四種蜆類：簾蛤（三角蜆）、青蛤（紅口蜆）、加夫蛤同埋綴錦蛤（菲律賓蛤仔）本會則建議體形最少要達 30毫米（即3厘米）先好採集。

如果掘蜆活動超過環境可承受的極限，不但對環境同埋生態造成破壞，仲會帶嚟其他負面影響。因此，希望大家掘蜆時能夠取得一個平衡點，進行休閒活動嘅同時，亦加入保育嘅概念，減少對環境造成干擾。

想了解更多關於關於蜆嘅資訊？快啲click入網站！